الناس معادن

 ( الناس معادن )

الغالي ماهما أتنسي..

ساكن حدود الذات.. 

والبعد ماهما خده..

بتقربوا المسافات.. 

والقلب ماهما قسي..

بيلين في لحظة حنان.. 

ومعادن الإنسان..

تظهر مع الأزمات.

في ناس تشوفهم تعوذ..

علشان كلامهم دبش..

بوزهم دايمًا مِبَوَّز..

والكلمة منه كلبش..

وناس خفاف ع القلب..

 بتهادي وتداوي..

حكاويها زي الغناوى..

وقعدتها ما بتتسابش.. 

وإن مر طيفهم في بالك..

حتى في عز إنشغالك..

قلبك ياخدهم بدالك..

بالحضن والسلامات.

وفي ناس خسيسة ولئيمة..

مالهمش في القلب قيمة..

ولا يسووا جزمة قديمة..

عايشين في عرضك ينهشوا..

ولا جم في يوم إختشوا..

ولا حسوا بالإهانات. 

وفي ناس سيريتها ساكنانا..

في الحلوة والمرة معانا..

شوف كام مفارق حياتنا..

ذكره جوانا..

وكام عايش معانا..

بس م  الأموات.

عصام السعدني.