صاحب الملكوت

 ( صاحب الملكوت )

هلاقي لنفسي فين راحة...

إلا في رحابك يا عظيم...

ما فيش في الدنيا دي ساحة...

تجمعنا غير بيت الكريم.

           ********

مفيش غير ذكرك إنت يارب...

بيجلي الروح ويشفي القلب...

عنا بيبعد أي غلب...

ومن غيرك بحالنا عليم.

           ********

في ذكرك ١٠٠٠ طاقة نور...

في ركعة وسجدة همي يغور...

ويبقى القلب متطمن...

ومتأنس وكله سرور...

وينسى الهم ويا الغيم.

          ********

تملي علينا بتطبطب...

وماهما عَصِينَا بتطيب...

خاطرنا.. ولما بنقرب...

برغم ذنوبنا تبقى رحيم.

           ********

قلوبنا شايلة ياما مرار...

وأوجاعنا مشاعل نار...

هموم الدنيا كويانا...

وسقيانا العذاب قنطار...

لكن لطفك علينا يارب...

يداوي وجعنا بإستغفار...

وتتحول حياتنا نعيم. 

          ********

ماليش غيرك وبلجألك....

في طاعتي تملي باشتاقلك...

وحتى في ذنبي بارجعلك...

يارب يا (صاحب الملكوت)...

ده الملك لك.. والفضل لك...

نور طريقي برحمتك...

نفسي أكون في معيتك...

طمعان يارب في جنتك...

في معيتك.. وفي ذمتك...

إحساسي ليك دايما يهيم. 

بقلم...

عصام السعدني.

أنا الفلاح

 أنا الفلاح...

ويعني الفلح كان عيبة...

بلا خيبة...

أنا الفلاح...

تملي حياتي مليانة...

بشقى وكفاح...

في نص الليل أقوم أسقي...

وقُوتِي بَلِمَّه من أرضي...

وِمتمرمط عشان رزقي...

وصاين عزتي وعرضي...

ورغم البهدلة مرتاح. 

أنا الفلاح...

تملي عنيا مليانة...

ما أذلش إيدي يوم بسؤال...

ما أخليش نفسي متهانة...

وراضي ماهما ضاق الحال...

ولا إستنيت في يوم منحة...

ولا مديون لحد بمال...

ماليش في العنطزة والفخر...

فواعلي كتافي شالت صخر...

ورامي حمولي طول الشهر...

عشان رب العباد فتاح.

في إيدي تلاقي دايما فاس..

وأحياناً بكون كنَّاس.. 

لكن ما اعملش خدي مداس.. 

عشان أرضي جميع الناس..

وجندي كمان من الحراس ...

مرابط ع الحدود أحرس...

وشايل بين إيديا سلاح.

أنا الفلاح...

برغم البهدلة وقرفي...

برغم المرمطة والذل...

بصون أهلي وبصون شرفي 

وخيري من زمان ع الكل...

وراضي وقلبي كله سماح. 

أنا الفلاح..

أصيل وبأصلي بتعامل..

ولا بنافق ولا بجامل..

وشايل حزني بالكامل..

ماليش في المنظرة واللعب..

ولا ف قولة ده جه أو راح. 

أنا الفلاح..

في قلبي م الجراح خزان..

وطيبة قلبي بالأوزان...

وأفعالي ب حساب وميزان...

ورغم القسوة والأحزان...

حياتي كلها أفراح. 

بقلم 

عصام السعدني.

من غيرك يا أمي

 ( من غيرك يا أمي )

ومن غيرك..

 أنا غايب.ومش موجود..

ومن خيرك..

 بقالي في الحياة دي وجود..

أماني كنتي في طفولتي وأنا بَحْبِي...

ولسة لحد دلوقتي..

 على كتفك أنا مسنود.

بضمة يا غالية من حضنك ...

بحس إني في نعمة وخير...

بلاقي نفسي متطمن...

ومتأمن بحصن كبير...

ياست الكل..

 كل الدنيا تشهدلك..

على جودك وعن فضلك..

وعن أصلك وأوصالك...

وماهما دفعت من عمري...

يكون ذرة في أفضالك...

بقولهالك..

بعيد عن نور عنيكي إنتي..

ولو سنتي بكون مفقود. 

********************

ياقيمة وعالية في مقامك...

يا جنة وغالية كالفردوس...

كبرت ولسة قدامك...

صغير لسة أو ننوس..

بجنة تحت أقدامك..

هداكي ربنا القدوس..

وعلاكي وغلاكي..

وخلاكي ملاذ لينا..

ولو مرة في يوم توهنا..

بكل حنان تدلينا...

ولو صاب الزهق روحنا..

بغنوة شوق تسلينا..

وتحكيلنا كمان نكتة..

إذا م اللعب مللينا..

ولو ضاقت بنا الدنيا..

بدعوة حب من قلبك..

بتفتح كل شئ مسدود. 

بقلم

عصام السعدني...

السلك ضاربني

 ( السلك ضاربني )

السلك ضاربني ومش لاقي..

والحال تعبان..

وبروح ع البقال والخضري..

وعند اللبان..

وِبَطَلَّع كل إللي في جيبي..

وما حدش داري بتعذيبي.. 

لا وإيه في الآخر يا حبيبي..

يقولولك خد بدل الباقي..

بسكوت ولبان.

وأنا بقى من غير سابق إنذار..

بتحول وافقد أخلاقي..

وبلاقي عنيا تطق شرار..

وتطلع نار..

وكأن عناصر تكويني..

 من نسل الجان.

والناس حواليا تهديني..

في حكم ومواعظ تديني..

طب أصوت وأشق هدومي..

ده أنا ناقص أطلع من ديني..

جوايا من الأحزان خزان. 

حد يشوفلنا طيب تصريف..

ما بقيتش مِلاحِق ع المصاريف..

وحياتي بقت بأمانة خريف.. 

من غير تزيف 

ما بقتش ب أحس بأي أمان.

ما يوماتي بلاقي السعر في حال..

وبلاقي الحزن عشاني حزين...

ماهو لاقي الوضع بجد محال..

بروتين وحبوب وكمان بنزين..

هي المشرحة نقصاها قتيل..

والله أصور فيكوا قتيل..

ماحناش ناقصين..

ده الواحد عايش بالبركة..

والبعدا في وادي ومش حاسين..

عاملين الودن دي من طينة..

والودن التانيه طبيعي عجين..

عايزينا نحس بمشاكلهم..

أُمَّال مشاكلنا يحسها مين..

أقسم بالله عقلنا فوت..

ماهي حاجة تعصب وتموت..

وعقولنا خلاص هيصيبها جنان.

بقلم..

عصام السعدني..

الناس المطحونة

 ( الناس المطحونة )

مليون ١٠٠٠ سلام وتحية..

على كل الناس المطحونة..

إللي بتسعى وتشقى وتتعب..

ولا يوم قالت عايزه مؤونة..

إللي بتصحى الصبح تحارب..

على كيس فول ومعاه طعمية..

ورغيف مسخوط جوه طابونه. 

ساكنين طول العمر في أوضة..

ولا راحوا مدارس ولا روضة..

وبرغم إن عشيتهم سوده..

مقالوش مره يا خلق غِيتُونا. 

راضيين دايما باللي معاهم..

على قد تعبهم وشقاهم..

مش باصين للناس في حياتهم..

ولا تفاصيل الناس شاغلاهم..

ولا بيقولوا ياناس إدونا.

كل طموحهم عيشه بسيطه..

مش طالبين لا دولار ولاسِنْتِي..

ولا بيحبوا الشو والظيطه..

ولا عايزين فيلات في مدينتي..

ولا ياكلوا في ماك أو كنتاكي..

ولا بيقضوا الصيف في الجونة.

ونضاف من جوه ومن بره..

وقلوبهم ع الأوجاع صابره..

بس نفوسهم صافية وحره..

لكن أحلامهم مسجونه.

بقلم

 عصام السعدني

أحلام وردية

 (أحلام وردية)

وعشان أحلامك وردية..

دورلك على كام وردية..

واتنقل من ديه لديه..

وانسى إنك وسط الجنه تعيش..

ماهو أصل جحيم الشغلانة..

عمره ما هيحصل أكل العيش..

وإذا كنت مخلف كام عيل..

بَيِّت في الشغل كمان ما تجيش..

وإياك تتحجج وتقوللي..

أنا عيني ما داقت طعم النوم..

خليك شغال صاحي مصحصح..

م الليل للصبح لِغِيِتْ تاني يوم..

علشان تقدر تجمع بقشيش..

علشان بيتك يعرف يصرف..

ومراتك تسكت وما تشكيش..

وتقول دي العيشة بقت تقرف..

لما بتطلب وتلاقي مافيش..

ما هو أصل العيشة بقت غاليه..

وإن يوم قولتلها نجيب فرخة..

تلاقيها في ثانيه تقوم صارخة..

وتقول المصروف ما يكفيش..

يشتري م الفرخة شوية ريش..

وإن يوم فكرت تاكل لحمه..

ف هقولك تاهت في الزحمه..

وحقيقي بجد مفيش رحمه.  

ومافيش برسيم وعلف ودشيش..

وإن قولت إقلي بطاطس في الزيت..

ف هاقول على عيني ياخويا ياريت..

ده مفيش ريحته بتاتا في البيت..

وياريت تسكت ما تفكرنيش..

وإنت يا ولداه في صخر بتنحت..

علشان تجمع حبة ملاطيش..

مش ناقص بس إنك تشحت..

أو حتى تبيع أفيون وحشيش..

بقلم 

عصام السعدني

قانون الغاب

 ( قانون الغاب )

قانون الغاب طلع سرداب..

موصل ع القلوب دُغْرِي ..

وأفعال إللي سب وعاب..

دي حالة بعيشها من صغري..

ومين صادق ومين كداب..

ومين ينكت ومين يهري..

شاشات سوده لأفكارنا وضمايرنا..

في دنيا عايشها ناس غيرنا 

ويوم ورا يوم ودا حالها..

ما بين الشد في احبالها..

وبين متعلقين فيها..

وشابطين في الأمل دايما..

ب إيدنا تملي وسنانا..

وروحنا تعزي في سنيننا..

و مر نلاقي غيره أمرّ.. 

وأسوأ م المرار حالنا..

وبنقطع في فروة بعض..

وبنبيع إللي سانْدِينَّا..

وخدنا ذنوبنا بالإحضان.. 

وبيعنا بالرخيص ديننا..

وحذفين من قاموسنا الخير..

وحب الناس مع الطيبه..

نفوس عايشة ب ١٠٠ عله..

وغيرها عايشة مكسوره.. 

ومقهورة من الخيبة.. 

وناس الخسة في طباعها..

ولا  أخلاق ولا مله..

وعاملة إنها حبيبة.. 

وواكلين من طبق واحد..

ونسيوا يلا بسم الله.. 

وتاه الأصل في طباعهم

بطبع الخِسَّة والقلة.. 

لكن عادي..

مسير الحال هيتبدل..

ويتعدل ويبقى تمام..

وننسى المر ونكمل..

وننسى قساوة الأيام..

نقابل ناس ماليها الخير..

ولا بتستنى كلمة شكر..

ولا بتجرح بأي كلام..

قلوبهم عايشة بتطبطب..

ومليانة بخير وسلام.

بقلم..

عصام السعدني